-
Kəhriz bərpası Layihəsi
BMqT-nin Azərbaycanda keçmiş layihələrindən əldə edilmiş müsbət nəticələrə və həyata keçirilən Kəhriz bərpası layihələrinin benefisiarların yaşayış vasitələrinə müsbət təsirinə əsaslanaraq, BMqT Koreya Beynəlxalq Əməkdaşlıq Agentliyinin maliyyə dəstəyi ilə Azərbaycanın qərb bölgələrində Kəhriz Bərpası layihəsini həyata keçirir.
Layihənin ümumi məqsədi Azərbaycanda kənd təsərrüfatı icmalarının enerjisiz su təchizatını təmin etməklə kənd təsərrüfatı məhsuldarlığını və yaşayış imkanlarını artırmaqla məcburi iqtisadi miqrasiyanın qarşısının alınmasına töhfə verməkdir. Kəhrizlərin bərpası ilə yanaşı, layihə gender, idarəetmə və ətraf mühitin davamlılığı kimi məsələlərə xüsusi diqqət yetirərək, icma tərəfindən idarə olunan bir yanaşmanı tətbiq etməyə davam edir.
Bu layihə 3 fərqli, lakin bir-biri ilə sıx əlaqəli yanaşma çərçivəsində həyata keçiriləcək. Bunlar Kəhrizlərin bərpası, Suvarma suyu kanallarının bərpası və İcmaların və Kankanların Bacarıqlarının artırılmasıdır.
BMqT lazımi infrastruktur obyektlərinin, suyun bölüşdürülməsi sxemlərinin inkişafı vasitəsilə sudan istifadəni və kənd təsərrüfatı istehsalının optimallaşdırılmasını hədəfləyir. Mövcud suvarma imkanlarının artırılması ilə kənd təsərrüfatı məhsuldarlığı və iş yerlərinin yaradılması təşviq ediləcək. Kəhriz sistemlərinin, eləcə də suvarma kanallarının davamlılığı yenilənmə prosesində fəal iştirak edəcək icma əsaslı Sudan İstifadəçi Komitələrinin (SUK) formalaşdırılması ilə təmin ediləcək. Yerli hökumət Kəhrizlərin və suvarma kanallarının mühafizəsi, gələcək baxımı və saxlanması ilə bağlı müvafiq siyasətin işlənib hazırlanmasına cəlb olunacaq və dəstəklənəcək.