Hər il olduğu kimi cari ildə də Beynəlxalq Miqrasiya Təşkilatının Azərbaycan nümayəndəliyi BMT-nin digər agentlikləri və digər tərəfdaşlar olan hökumət qurumları, vətəndaş cəmiyyəti təşkilatları, özəl sektor, beynəlxalq tərəfdaşlar, gənclər, insan və qadın hüquqları müdafiəçiləri, media və akademik dairələrlə birgə BMT-nin Əhali Fondunun 16 Günlük Fəallıq tədbirləri çərçivəsində qadınlara və qızlara qarşı zorakılıqla mübarizəyə yönəlmiş qlobal səylərə dəstək verməklə həmrəylik nümayiş etdirir.

Noyabrın 29-da BMqT-nin Azərbaycandakı Nümayəndəliyinin rəhbəri Vladimir Qyorqiyev “Gender əsaslı zorakılıq və ayrı-seçkiliyə qarşı Debat Forumu” kampaniyası çərçivəsində Mingəçevir Dövlət Universitetində keçirilən tədbirdə iştirak etmişdir. Qyorqiyev çıxışında bu cür kampaniyalar çərçivəsində ictimaiyyətin maarifləndirilməsini artırmaqla gender əsaslı zorakılıqla mübarizənin effektivliyini artırmaq üçün tərəfdaş təşkilatlar arasında əməkdaşlığın vacibliyini vurğuladı.

Nümayəndəliyin rəhbəri çıxışında qadınları və qızları zorakılığın bütün formalarından qorumağa və belə halların qarşısını almağa çağırıb: “Müdafiə qurban mərkəzli yanaşmanın əsasıdır və cəmiyyətin gender əsaslı zorakılıqla mübarizə səylərində vacib yer tutmalıdır. Zorakılıq qurbanlarının effektiv müdafiəsi qurbanların müəyyən edilməsini, hərtərəfli xidmətlər üçün müraciətlərin təmin edilməsini və bu şəxslərə həyatlarını yenidən qurarkən dəstək verilməsini nəzərdə tutur. Zorakılığın qarşısının əvvəlcədən alınması səyləri gender əsaslı zorakılıqla mübarizə səylərinin eyni dərəcədə vacib tərkib hissəsidir. Dəqiq və məqsədyönlü məlumatların yayılması, qadınlara və qızlara qarşı zorakılıq haqqında maarifləndirmənin aparılması ilə icmalar bu cür zorakılıq təhlükəsinə daha yaxşı cavab verməyə hazır olacaqlar”.

Qeyd edək ki, BMqT-nin Azərbaycandakı nümayəndəliyi qadınlara və qızlara qarşı zorakılıqla mübarizəyə həsr olunmuş 16 Günlük Fəallıq tədbirlərinə verdiyi dəstəklə yanaşı, BMqT tərəfindən həyata keçirilən USAID-inin maliyyələşdirdiyi İnsan Alverinə Qarşı Mübarizə layihəsi çərçivəsində Azərbaycan hökumətinə və QHT-lərə insan alverinin və məcburi əməyin qarşısının alınması və onunla mübarizədə, o cümlədən gender əsaslı zorakılığın aradan qaldırılmasında Azərbaycanın effektivliyini daha da artırmaqda kömək edir. Buraya, həmçinin insan alveri və zorakılğın potensial və faktiki qurbanlarının ləyaqətini dəstəkləyən və onlara normal həyat sürmək imkanı yaradan, yaşayış yeri verən və xidmətlər göstərən sığınacaqları idarə edən vətəndaş cəmiyyəti təşkilatlarına texniki və maliyyə dəstəyi daxildir.