16-17 yanvar tarixlərində BMqT-nin Azərbaycandakı nümayəndəliyinin müvafiq proqram işçiləri Mingəçevir, Bərdə, Kürdəmir və Ağsuya səfər edərək Könüllü Qayıdışa Yardım və Reinteqrasiya layihələri çərçivəsində Niderland Krallığından könüllü mənşə ölkəsinə qayıtmış şəxslərə reinteqrasiya yardımı göstərmişlər. Layihə çərçivəsində könüllü geri qayıdan vətəndaşlar BMqT-nin dəstəyi ilə gəlir gətirən fəaliyyət sahəsinin qurulması məqsədilə iri və xırda buynuzlu heyvanları satın almışlar. Belə ki, Mingəçevirdə yetişdirmək üçün bir ailə 87 qoyun, digər ailə 21 buzov, Bərdədə geri dönən şəxs süd və süd məhsulları istehsalı üçün 2 inək, Kürdəmirdəki ailə yetişdirmək üçün 25 buzov, Ağsuda qayıdan şəxs süd və süd məhsulları istehsalı üçün 2 inək satın aldı.

BMqT-nin Azərbaycandakı nümayəndəliyi hazırda İsveçrə, Belçika, Almaniya, Macarıstan, İtaliya, Hollandiya, Türkiyə və Latviyadan könüllü geri dönənlərə yardım fəaliyyətini göstərir. Ayrılmış reinteqrasiya vəsaitləri bir iş qurmaq, mövcud biznesə sərmayə qoymaq, təhsil almaq, habelə müvəqqəti yaşayış üçün istifadə edilə bilər.