18 iyul tarixində Dövlət Miqrasiya Xidməti və Beynəlxalq Miqrasiya Təşkilatının Azərbaycan nümanyəndəliyinin təşkilatçılığı ilə Miqrasiya üzrə Regional Təlim Mərkəzinin (RTCM) təşəbbüsü çərçivəsində “Miqrasiya Məktəbi - 5” layihəsinin bağlanış mərasimi keçirilib. Layihə çərçivəsində təlimlər dövlət qurumları, beynəlxalq təşkilatlar, özəl sektor və qeyri-hökumət təşkilatlarının ekspertləri tərəfindən aparılır.

Dövlət Miqrasiya Xidmətinin rəisi Vüsal Hüseynov yeni məzunların nəticələrini yüksək qiymətləndirərək, təlimlərdə diqqət  yetirilən miqrasiyanın müxtəlif aspektlərinin, o cümlədən sosial, iqtisadi, humanitar və hüquqi məsələlərin əhəmiyyətini vurğuladı. Vüsal Hüseynov bu cür təlimlərin nəticələrinin Azərbaycanda “Təhlükəsiz, nizamlı və qanuni miqrasiya üzrə Qlobal Pakt”ın səmərəli həyata keçirilməsinə töhfə verəcəyinə əminliyini ifadə edib.

Qeyd edək ki, Qlobal Pakt miqrasiyanın idarə edilməsini təkmilləşdirmək, bugünkü miqrasiya ilə bağlı problemləri həll etmək, miqrantların və miqrasiyanın dayanıqlı inkişafa töhfəsini gücləndirmək üçün miqrasiya üzrə ilk hökumətlərarası danışıqlar yolu ilə hazırlanmış sazişdir.

BMqT nümayəndəsi Amr Taha təmsil etdiyi təşkilatın bu mühüm təşəbbüsün tərəfdaşı olduğuna görə təşəkkürünü bildirdi. O, daha sonra məzunları təbrik edərək, Miqrasiya üzrə Çempion ölkə olan Azərbaycanda bu sahədə çoxlu imkanların olduğunu qeyd edib.

Amr Taha miqrasiyanın 2030-cu ilin Dayanıqlı İnkişaf Məqsədlərində də qəbul edildiyi kimi, yaxşı idarə edildikdə, davamlı inkişafa necə töhfə verdiyinə dair bəzi nümunələri bölüşdü. О, fikrinin sübutu kimi   Ümumdünya Miqrasiya Hesabatından “Dünya əhalisinin 3,6 faizini təşkil edən beynəlxalq miqrantların qlobal Ümumi Daxili Məhsulda payının 9 faiz təşkil edir” sitatını misal gətirdi.

Mərasim məzunlara sertifikatların təqdim edilməsi ilə yekunlaşdı.

Miqrasiya üzrə Regional Təlim Mərkəzi 2018-ci ildə BMqT-nin texniki və maliyyə dəstəyi ilə Dövlət Miqrasiya Xidmətinin təşəbbüsü ilə yaradılmış, məqsədi Azərbaycanda, qonşu MDB ölkələrində və onun hüdudlarından kənarda miqrasiya idarəçiliyi üzrə bilikləri artırmaqdır. O, həmçinin regionda hökumətlər və maraqlı tərəflər arasında siyasət dialoqu, tədqiqatlar üzrə bilik mübadiləsi platforması kimi xidmət edir.

Miqrasiya üzrə Regional Təlim Mərkəzi BMqT-nin İnkişaf Fondu tərəfindən maliyyələşdirilib.