28 fevral - 26 may 2023-cü il tarixləri arasında ABŞ İnkişaf Agentliyi tərəfindən maliyyələşdirilən BMqT-nin İnsan Alverinə Qarşı Mübarizə üzrə Fəaliyyət layihəsi çərçivəsində təşkil olunmuş  Liderlik, Kompüter savadlılığı və Əsas mühasibatlıq təlim kurslarından ümumilikdə 30 qadın faydalanmışdır. Bu təlimlər Sumqayıt Qadın Resurs Mərkəzində BMT-nin İnkişaf Proqramı ilə birgə əməkdaşlıq çərçivəsində təşkil olunmuşdur. Məqsəd cəmiyyətin həssas qruplarından olan qadınları təhlükəsiz və sabit iş tapmaq imkanı verən rəqəmsal və qeyri-texniki bacarıqlarını təkmilləşdirməkdir.

Rəqəmsal və mühasibat bacarıqları bu gün məşğulluq bazarında, xüsusən də natamam təhsilli və ya təhsildən yayınmış qadınlar üçün vacib tələblərdən biridir. 48 saatlıq kompüter təlimlərində 18 benefisiar elektron poçtdan istifadə, informasiya axtarışı, Word, MS Excel və MS Power Point proqramları vasitəsilə sənədlər, cədvəllər və təqdimatlar yaratmağı öyrəndilər.

Mühasibatlıq kursunu bitirmiş benefisiarlardan biri olan Könül təlimlərin onun gələcəkdə iş tapmaqda kömək olacağına əmindir: “Hazırda işsizəm, amma peşəkar olaraq inkişaf etmək istəyirəm. İnanıram ki, mühasibat uçotu kursu zamanı əldə etdiyim pul vəsaitlərinin uçotu, gəlir və xərclər üzrə biliklər şəxsi maliyyəmi düzgün şəkildə idarə etməyə kömək edəcək. Artıq mühasibatlıq üzrə peşəkar sertifikatlaşdırma proqramlarından birinə yazılmağı düşünürəm ki, bu da mənə iş axtarışlarımda üstünlük qazandıracaq”.

Ümumilikdə 30 benefisiar iş yerində və gündəlik həyatda liderlik bacarıqlarının əhəmiyyəti, effektiv ünsiyyət qurmaq, münaqişələri idarə etmək və danışıqlar aparmaq üsulları kimi mövzuları əhatə edən 32 saatlıq Liderlik bacarıqları təlimində iştirak etmişdir. “Bu kursun ilk günlərindən necə dəyişdiyimi görürəm. İndi öz fikrimi ifadə edəndə, özümü təqdim edəndə daha inamlı hiss edirəm”, – deyə fikirlərini bölüşən Yeganə xanım təşkil olunan ödənişsiz kurslara görə minnətdarlığını bildirib.

BMqT tərəfindən 2015-ci ildən etibarən həyata keçirilən USAID-inin maliyyələşdirdiyi İnsan Alverinə Qarşı Mübarizə layihəsi Azərbaycan hökumətinə və QHT-lərə insan alverinin və məcburi əməyin qarşısının alınması və onunla mübarizədə, o cümlədən gender əsaslı zorakılığın aradan qaldırılmasında Azərbaycanın effektivliyini daha da artırmaqda kömək edir. Buraya insan alveri və məcburi əməyin potensial və faktiki qurbanlarına kömək edən sığınacaqlari idarə edən vətəndaş cəmiyyəti təşkilatlarına texniki və maliyyə dəstəyi daxildir.