Baku - Martın 4-də BMT-nin Yaşayış Məskənləri Proqramının (UN-HABITAT) icraçı direktoru (BMT Baş katibin müavini statusunda) xanım Maimunah Mohd Şərifin başçılıq etdiyi və Beynəlxalq Miqrasiya Təşkilatının Azərbaycan nümayəndəliyinin rəhbəri Vladimir Qyorqiyevin də qatıldığı nümayəndə heyəti Ağdam şəhərinə səfər etdi.

Nümayəndə heyətini qarşılayan Qarabağ iqtisadi rayonuna daxil olan ərazilərdə Azərbaycan Respublikası Prezidentinin xüsusi nümayəndəsi Emin Hüseynov qonaqları şəhərin baş planı, ərazilərdə gedən bərpa-quruculuq işləri ilə tanış etdi. Azərbaycan Hökumətinin bərpa prosesinə yanaşması və idarəetmə mexanizmi də onlara izah edildi.

Nümayəndə heyəti Ağdam Şəhidlər Xiyabanını və Dram Teatrını ziyarət ediblər, Ağdam Şəhərində ilk yaşayış binasının tikintisi ilə yaxından tanış olublar.

Azərbaycana 3 günlük səfər çərçivəsində UN-HABITAT proqramının icraçı direktoru ölkənin rəsmi şəxsləri ilə bir sıra görüşlər keçirib.